Chamamento á veciñanza de Moaña para engalar con motivos mariñeiros a fronte marítima da vila durante o Encontro

O Concello de Moaña acolleu unha reunión do Comité Organizador do 15 Encontro de Embarcacións Tradicionais de Galicia (EETG) que se celebrará entre os días 5 e 8 de agosto en Moaña. A xuntanza, na que estiveron presentes representantes das tres entidades organizadoras (Culturmar, Concello de Moaña e a Asociación Recreativa e Cultural ‘Sueste’) tamén contou coa presenza de membros das asociacións veciñais, profesionais, culturais e deportivas da vila.

Na reunión deuse conta dos últimos avances na programación desta grande festa do patrimonio marítimo-fluvial, que se fará pública nos vindeiros días. O Comité Organizador falou da importancia da ambientación e da decoración de rúas, espazos públicos e todo tipo de edificios. A idea é que o mar estea presente en todos os recunchos da vila durante a celebración dunha festa que, sen dúbida, é un importante elemento de atracción turística.

Ademais da ambientación coa imaxe corporativa do 15 Encontro de Embarcacións Tradicionais da que se farán cargo as entidades organizadoras e colaboradoras, o obxectivo é que as vivendas e locais de Moaña, principalmente os da fronte marítima, se engalanen con retallos do noso patrimonio marítimo fluvial (nasas, redes, remos, áncoras, cabos, nós mariñeiros, velas,…).

HISTORIA

Culturmar (Federación Galega pola Cultura Marítima e Fluvial) convoca cada dous anos, desde 1993, o Encontro de Embarcacións Tradicionais de Galicia entre as súas asociacións. A este evento están convidados todas as asociacións pertencentes a Culturmar e entidades afíns, tanto de Galicia como de Portugal, Irlanda, Francia, País Vasco, Cataluña, Andalucía, Levante ou Illas Baleares, así como particulares e institucións de interese cultural e patrimonial.

O Encontro consiste nunha gran concentración de embarcacións tradicionais representativas do patrimonio marítimo galego, así como doutras zonas, acompañados de actos culturais e de lecer, xornadas de conferencias, coloquios, exposicións, publicacións, música e danza tradicional, artesanía, etc.

Esta celebración quere poñer de relevo a riqueza do patrimonio marítimo e fluvial galego e a necesidade de conservalo. Os Encontros tamén serven para amosar o traballo no eido da recuperación do patrimonio feito polas asociacións, é ó mesmo tempo, supón unha actividade de dinamización social e de lecer, converténdose nunha festa atractiva para os cidadáns e visitantes da vila que acolle o Encontro.

15EETG, EETG, Embarcacións, Encontro, Moaña, Ría de Vigo, Verán 2021

15º Encontro de Embarcacións Tradicionais de Galicia

MOAÑA do 5 ao 8 de agosto de 2021

Organización

Patrocinio

Síguenos

Webs relacionadas

Contáctanos

15º EETG. Todos os dereitos reservados.
Deseño e imaxe Diego Seixo.

Esta web utiliza cookies propias para o seu correcto funcionamento. Ao facer clic no botón Aceptar, aceptas o uso destas tecnoloxías e o procesamento dos teus datos para estes propósitos.    Máis información
Privacidad